Усе запісы ад radabnr

БУДУЧЫНЯ Ў РУКАХ КОЖНАГА І КОЖНАЙ З НАС. ЗВАРОТ СТАРШЫНІ РАДЫ БНР ІВОНКІ СУРВІЛЛЫ

Дарагія суродзічы-беларусы,

Ад імя Рады Беларускай Народнай Рэспублікі віншую вас з 25 жніўня, днём адраджэньня незалежнасьці Беларусі.

Пачынаецца юбілейны, трыццаты год існаваньня адроджанай Беларусі як сувэрэннай паўнавартаснай дзяржавы. Адраджэньне Беларусі было вынікам дзесяцігодзьдзяў упартай барацьбы, тысячы людзей ахвяравалі жыцьцём і свабодай дзеля гэтага.

Нашае змаганьне за свабоду і дэмакратыю ня скончаная і дагэтуль. Сотні тысячаў беларусаў у апошнія тыдні пераадолелі свой страх і, нягледзячы на пагрозы дыктатара і ягоных памагатых, выйшлі на вуліцы сваіх гарадоў, каб заявіць, што Беларусь павінна належаць усім яе жыхарам, а не аднаму чалавеку.

Перамога над тыраніяй ня будзе простай. Нашаму народу наканавана прайсьці праз больш жорсткія выпрабаваньні, чым іншым.

Я жадаю ўсім нам сілаў, трываласьці і веры ў лепшую будучыню. Гэтая будучыня ў руках кожнага беларуса, кожнага і кожнай з нас.

Будзьце сьмелыя, будзьце годныя, будзьце моцныя духам, каб дачакацца перамогі і наблізіць яе. Праўда на нашым баку, і перамога будзе нашай.

Івонка Сурвілла
Старшыня Рады БНР

Савецкая прапаганда пра партнэрства СССР з Гітлерам – 1940 год

На гадавіну Пакта Молатава-Рыбэнтропа ў 1940 г. галоўная савецкая газэта “Правда” на першай старонцы апублікавала артыкул, у якім праслаўляла “сяброўства народаў СССР і Нямеччыны” і абвінавачвала Брытанію і Францыю ў распальваньні вайны.

ў 1940 г. галоўная савецкая газэта “Правда” на першай старонцы апублікавала артыкул, у якім праслаўляла “сяброўства народаў СССР і Нямеччыны” і абвінавачвала Брытанію і Францыю ў распальваньні вайны.

Працягнуць чытаць Савецкая прапаганда пра партнэрства СССР з Гітлерам – 1940 год

Штандар наш бел-чырвона-белы

Як нацыі, што перажыла цяжкія часы прыгнёту, беларусам уласьцівыя нацыянальныя сьціпласьць і комплекс непаўнавартасьці, якія адным не дазваляюць ганарыцца рэчамі, аб’ектыўна вартымі гонару, а іншым дазваляюць ганарыцца чужымі дасягненьнямі як сваімі, гэтаксама як і гіпэрбалізаваць свае.

І ўсё ж, бяз страху быць абвінавачаным у другім, хочацца падзяліцца сваімі суб’ектыўнымі эмоцыямі, выкліканымі аб’ектыўнай, зрэшты, рэччу.

Ці паспрачаецца хто з тым, што ніводная іншая нацыя ў сьвеце ня мае нагэтулькі ж выразнага, яскравага, энэргетычнага сьцягу, як беларускі нацыянальны бел-чырвона-белы?

Працягнуць чытаць Штандар наш бел-чырвона-белы

БЕЛАРУСЫ ЗМАГАЮЦЦА ЗА СВАЮ І ВАШУ СВАБОДУ – ЗВАРОТ СТАРШЫНІ РАДЫ БНР ІВОНКІ СУРВІЛЛЫ (пераклад)

Дарагія сябры Беларусі,

Паважаныя лідэры дэмакратычнага сьвету, нашыя суседзі ў Эўрапейскім Зьвязе і Украіне, нашыя саюзьнікі ў Канадзе і ЗША, нашыя сябры і прыхільнікі па ўсім сьвеце, у Японіі, Ізраілі, Расеі і ў іншых краінах.

Сёньня Беларусь знаходзіцца на гістарычным раздарожжы.

Нашай краінай ужо 26 гадоў кіруе аўтарытарны рэжым Аляксандра Лукашэнкі. Гэта быў час хлусьні, карупцыі і гвалту; час беззаконьня, трагедыі і ганьбы для нашага народу.

Беларусь – апошняя дыктатура Эўропы, апошняя краіна гэтага кантынэнта, якая да гэтага часу ня здолела пазбавіцца цёмнай спадчыны савецкага рэжыму, пераадолець страшныя траўмы, якія нанёс таталітарызм нашаму народу.

Але сёньня, упершыню за многія гады, Беларусь мае рэальны шанец зноў стаць дэмакратыяй, зрабіцца краінай, якой кіруе яе народ, а ня воля аднаго карумпаванага і злога чалавека.

Цяпер Беларусі патрэбна вашая падтрымка.

Як мы бачылі толькі некалькі дзён таму, рэжым Аляксандра Лукашэнкі можа скарыстацца любымі спосабамі, уключаючы масавы тэрор і забойствы, каб перашкодзіць беларускаму народу перамагчы і аднавіць дэмакратыю і вяршэнства закона ў сваёй краіне.

Нам патрэбны міжнародны ціск на ўсіх, хто вінаваты ў паліцэйскім гвалце і ў фальсыфікацыі выбараў у Беларусі.

Людзям у Беларусі неабходная ваша салідарнасьць і маральная падтрымка ў гэтай рашучай бітве.

Больш за тое, ёсць відавочныя прыкметы таго, што гэтым крызісам можа скарыстацца нацыяналістычны рэжым Уладзіміра Пуціна ў Расіі, каб падарваць дзяржаўны сувэрэнітэт Беларусі. Дапамажыце нам супрацьстаяць гэтай пагрозе. Калі ласка, ня дайце Пуціну захапіць нашу краіну.

Згодна з воляй беларускага народа, Аляксандр Лукашэнка не зьяўляецца законным прэзыдэнтам Беларусі і не павінен быць прызнаны ў гэтай якасьці ніводнай дэмакратычнай краінай.

Беларусі патрэбныя новыя дэмакратычныя прэзыдэнцкія выбары і канстытуцыйная рэформа, якая скасавала б дыктатарскія законы, прынятыя Лукашэнкам падчас ягонага 26-гадовага аўтарытарнага і нелегітымнага праўлення.

Беларусь знаходзіцца цяпер на пярэднім краі барацьбы чалавецтва за свабоду супраць прыгнёту, за дэмакратыю супраць дыктатуры, за мір супраць нянавісьці і гвалту. У сьвеце, дзе дэмакратыя і каштоўнасьці свабоды кожны дзень сутыкаюцца з выклікам з боку сілаў карупцыі, цынічнай прагнасьці, папулізму і палітычнага экстрэмізму, Беларусь – гэта поле бою, якое мае надзвычай важнае значэньне.

Прашу вас, дапамажыце нам выйграць гэты бой. Бо гэта бітва “За нашу і вашу свабоду”, як гаворыць гістарычны дэвіз беларускага, літоўскага і польскага руху супраціву.

Івонка Сурвіла
Старшыня Рады Беларускай Народнай Рэспублікі

Зварот Старшыні Рады БНР з нагоды пратэстаў у Беларусі

Даражэнькія мае суродзічы!

Дазвольце выказаць вам маё захапленьне вашай адвагай, вашай упэўненасьцю і адначасна вашай памяркоўнасьцю.

Ганаруся кожным і кожнаю з вас! Вашая прысутнасьць на вуліцах беларускіх гарадоў, сёньняшнія забастоўкі, усе вашыя высілкі, каб дамагчыся зьменаў бяз гвалту, паказваюць усяму сьвету, які сьпелы, годны і цывілізаваны беларускі народ! Беларусы заслугоўваюць павагу і падтрымку ня менш, як іншыя народы Эўропы.

Прадаўжайце дамагацца вызваленьня ўсіх палітвязьняў, дамагацца справядлівых выбараў і неўмяшальніцтва Расеі ў вашае жыцьцё. Уладзімір Пуцін будзе старацца скарыстаць з падзеяў у Беларусі, каб памагчы дыктатару ўзамен на саюзную дзяржаву. Будзьце асьцярожныя. Маскоўскі дыктатар ні ў чым ня лепшы ад вашага! Не дазвольце яму ў ніякім выпадку турбаваць вас.

Беражыце сваё здароўе! Вам трэба перажыць гэты час моцнымі, каб магчы прадаўжаць барацьбу за лепшую Беларусь!

Люблю вас! Памажы вам Божа!

Жыве Беларусь!

Івонка Сурвілла
Старшыня Рады БНР

АЛЯКСАНДАР ЛУКАШЭНКА НЯСЕ АСАБІСТУЮ АДКАЗНАСЬЦЬ ЗА ГІБЕЛЬ ДЭМАНСТРАНТА Ў БЕЛАРУСІ – ЗАЯВА РАДЫ БНР

Рада Беларускай Народнай Рэспублікі выказвае свае шчырыя спачуваньні і смутак у сувязі з пацьверджанай гібельлю ўдзельніка акцыяў пратэсту ў Менску.

Санкцыянаваўшы выкарыстаньне зброі і спэцсродкаў супраць дэманстрантаў, Аляксандар Лукашэнка нясе асабістую адказнасьць за гэтую трагедыю.

Рада БНР рашуча асуджае фальсыфікацыі вынікаў выбараў і гвалт супраць мірных дэманстрантаў, якія выйшлі пратэставаць супраць парушэньняў выбарчага законадаўства і супраць узурпацыі ўлады.
Па ўсіх прыкметах, Аляксандар Лукашэнка пацярпеў паразу на выбарах і ня можа лічыцца легітымным прэзыдэнтам Рэспублікі Беларусь.

Рада БНР заклікае да неадкладнага вызваленьня ўсіх палітычных зьняволеных і да правядзеньня новых сумленных прэзыдэнцкіх выбараў па агульнапрынятых дэмакратычных стандартах і без удзелу Аляксандра Лукашэнкі.

Рада БНР выказвае сваю салідарнасьць зь мірнымі пратэстамі ў Беларусі і заклікае беларусаў у замежжы да актыўнага пратэсту з мэтаю данясеньня інфармацыі пра сытуацыю ў Беларусі да ўрадаў замежных краінаў.

Рада БНР заклікае міжнародную супольнасьць аказаць максымальны ціск на рэжым Лукашэнкі з мэтаю спыненьня тэрора супраць беларусаў і правядзеньня новых, свабодных, выбараў.

ЗВАРОТ СТАРШЫНІ РАДЫ БНР ІВОНКІ СУРВІЛЛЫ НАПЯРЭДАДНІ ВЫБАРАЎ

Шаноўныя суродзічы, дарагія беларусы.

Набліжаецца дзень выбараў прэзыдэнта Рэспублікі Беларусь.

Як і ўсе мінулыя выбары за апошнія 25 гадоў, сёлетняя кампанія не зьяўляецца сумленнай і свабоднай.

Многія моцныя лідары, якія маглі скласьці канкурэнцыю Аляксандру Лукашэнку, не дапушчаныя да ўдзелу ў выбарах. На сёньняшні дзень яны арыштаваныя. Некаторыя зь іх ужо шмат тыдняў гераічна церпяць зьдзекі ў лукашэнкаўскай турме.

Цяперашняя ўлада баіцца сумленнай барацьбы на выбарах. Гэтая ўлада ведае, што ня зможа на іх перамагчы.

Але ў нечым цяперашнія выбары адрозьніваюцца ад папярэдніх. У першы раз за доўгія гады беларускі народ па ўсёй краіне тысячамі выходзіць пад бел-чырвона-белым сьцягам, дамагаючыся зьменаў.

Абсалютная большасьць беларусаў жадае, каб нашая краіна была свабоднай, дэмакратычнай і незалежнай. Каб яна кіравалася па законе, а не па волі аднаго-адзінага чалавека.

Беларусы больш не жадаюць, каб краінаю кіраваў дыктатар, які, сярод іншага, ганебна праваліў барацьбу з пандэміяй каранавіруса і такім чынам нясуць адказнасьць за многія сьмерці.

Аляксандар Лукашэнка ня мае ані законнага, ані маральнага права балятавацца ў прэзыдэнты Беларусі.

Дарагія суродзічы! Самае важнае цяпер – гэта наша поўная еднасьць у тым, каб рашуча патрабаваць ад улады правядзеньня новых сумленных выбараў і вызваленьня ўсіх палітычных вязьняў.

Беражыце сябе і не забывайцеся пра пандэмію, якая працягваецца. І будзьце гатовыя да доўгай упартай барацьбы й працы дзеля будаўніцтва новай, свабоднай, заможнай беларускай Беларусі.

Жыве Беларусь!

Выступ ЗАступніка Старшыні Рады БНР М. Пачкаева на мітынгу ў Лёндане

11 ліпеня Заступнік Старшыні Рады БНР і Старшыня Згуртаваньня беларусаў у Вялікай Брытаніі Мікалай Пачкаеў выступіў на мітынгу салідарнасьці з Беларусьсю на Трафальгарскай Плошчы ў Лёндане.

Пераклад ягонага выступу з ангельскай мовы:

Працягнуць чытаць Выступ ЗАступніка Старшыні Рады БНР М. Пачкаева на мітынгу ў Лёндане

ДЭМАКРАТЫЧНЫЯ КРАІНЫ ПАВІННЫ АКАЗАЦЬ ПАЛІТЫЧНЫІ І ЭКАНАМІЧНЫ ЦІСК НА АЎТАРЫТАРНЫ РЭЖЫМ У БЕЛАРУСІ – ЗАЯВА РАДЫ БНР

Рада Беларускай Народнай Рэспублікі асуджае нерэгістрацыю ключавых кандыдатаў, якія выступаюць супраць Аляксандра Лукашэнкі на надыходзячых прэзыдэнцкіх выбарах, і патрабуе неадкладнага вызваленьня ўсіх актывістаў, палітыкаў, журналістаў і блогераў, затрыманых у Беларусі па палітычных матывах.

Нерэгістрацыя кандыдатаў, якія прадстаўляюць дэмакратычную апазыцыю, зьяўляецца яшчэ адным відавочным доказам таго, што цяперашнія прэзыдэнцкія выбары ў Беларусі не зьяўляюцца ані свабоднымі, ані справядлівымі. Гэта дадае да тых фактаў, што мясцовыя выбарчыя камісіі былі сфармаваныя без удзелу дэмакратычнай апазыцыі і што кандыдаты ад апазыцыі сутыкаюцца з палітычнымі рэпрэсіямі і ня могуць весьці перадвыбарчыя кампаніі ў адпаведнасьці з агульнапрынятымі дэмакратычнымі стандартамі.

Рада БНР заклікае правесьці новыя прэзыдэнцкія, парлямэнцкія і мясцовыя выбары ў Беларусі ў прысутнасьці міжнародных назіральнікаў і ў поўнай адпаведнасьці зь міжнароднымі стандартамі і дэмакратычнымі каштоўнасьцямі, якія задэкляраваныя ў Канстытуцыі Рэспублікі Беларусь. Аляксандар Лукашэнка ня мае законнага права балятавацца на гэтых выбарах.

Дэмакратычная Эўропа не павінна мірыцца з існаваньнем жорсткага аўтарытарнага рэжыму ў эўрапейскай краіне. Рада БНР заклікае ўсе дэмакратычныя краіны аказаць палітычны і эканамічны ціск на аўтарытарны рэжым у Беларусі з мэтай забесьпячэньня свабодных і справядлівых выбараў.

Нежаданьне шэрагу заходніх палітыкаў паставіць патрабаваньні дэмакратычных выбараў і павагі да правоў чалавека вышэй за эканамічны прагматызм у адносінах зь Беларусьсю зьяўляецца галоўнай прычынай зьяўленьня новых палітычных зьняволеных у Беларусі кожныя пяць гадоў у час выбараў. Беларусы застаюцца апошнім народам у Эўропе, які ня можа карыстацца свабодамі і правамі, якімі карыстаюцца ўсе эўрапейскія суседзі Беларусі.

Спыненьне дзеяньня дэкрэтаў савецкай улады ў Беларусі – 12.07.1918

12 ліпеня 1918 г. Народны Сакратарыят БНР выдаў пастанову аб спыненьні дзеяньня дэкрэтаў савецкае ўлады на тэрыторыі Беларусі.

Тэкст пастановы, які захаваўся ў архівах:


§ 1. Все декреты правительства Ленина, а также бывших народных комиссаров Западной области и фронта признать для Белоруссии недействительными.

§ 2. Впредь, до установления законов Белорусской Народной Республики, законами Временного бывшего Российской Республики правительства, и совершать свои акты именем Временного белорусского правительства.

§ 3. Единственным представителем и верховным органом Белорусской Народной Республики считать Народный секретариат, избранный Радой l Всебелорусского съезда.

Председатель Народного секретариата Иосиф Воронко

Управляющий делами Антон Овсянник