Заява Рады БНР аб разьмяшчэньні на тэрыторыі Беларусі расейскай ядзернай зброі
![](https://www.radabnr.org/wp-content/uploads/2023/05/nuclear-976x500.jpg)
Рада БНР рэгулярна папярэджвала Заходні сьвет, што ігнараваньне праблемаў Беларусі непазьбежна прывядзе да ўсталяваньня на тэрыторыі краіны вайсковай прысутнасьці Расеі,мэтай якой будзе пагроза Эўропы і ўсяму сьвету.
Сёньня гэты прагноз спраўдзіўся ў чарговы раз — паміж Масквой і Менскам падпісанае пагадненьне аб разьмяшчэньні ў сховішчах на тэрыторыі Беларусі нестратэгічнай (гэта значыць, тактычнай) расейскай ядзернай зброі.
Рада БНР зьвяртае ўвагу, што ў Беларусі адсутнічае легітымная ўлада — Лукашэнка ёсьць узурпатарам, які, як і ягоныя прызначэнцы, ня маюць ніякага права прымаць рашэньні за беларускі народ.
Цяперашняе ж рашэньне Масквы і Менску ставіць беларусаў пад пагрозу ня толькі ядзернага ўдару ў адказ, але і прэвэнтыўнага ядзернага ўдару — упершыню з часоў існаваньня СССР.
Рада Беларускай Народнай Рэспублікі заклікае ўрады і парлямэнты дэмакратычных краінаў падтрымаць беларускі народ у ягоным змаганьні супраць пуцінска-лукашэнкаўскай акупацыі.