У Беларусі распачынаюцца вайсковыя вучэньні “Захад-2017”, якія праводзяцца сумесна з вайсковымі фармаваньнямі Расейскай Фэдэрацыі. Гэтыя манэўры адбываюцца на фоне анэксіі Масквой Крыму, вайны ва Ўкраіне і Сырыі, кібэратакаў на дэмакратычныя інстытуцыі Захаду.

Рада БНР далучаецца да засьцярогаў, якія выказваюць дэмакратычная супольнасьць Беларусі і некаторыя міжнародныя назіральнікі датычна таго, што, нягледзячы на заявы прадстаўнікоў міністэрства абароны Беларусі, асобныя фармаваньні расейскіх войскаў могуць застацца на тэрыторыі Беларусі пасьля заканчэньня вучэньняў. Рада БНР падкрэсьлівае, што гэта сталася б новым фактарам небясьпекі ня толькі для Беларусі, але і для іншых краінаў Эўропы – Латвіі, Літоўскай Рэспублікі, Польшчы. Асаблівую пагрозу гэта будзе несьці для Ўкраіны, паколькі расейскія сухапутныя часткі ў гэтым выпадку маглі б нанесьці ўдар па яе паўночных і заходніх рэгіёнах.

Рада БНР адзначае, што выхад расейскіх частак з тэрыторыі Беларусі павінен адбыцца не пазьней чым 30 верасьня, як пра гэта заяўлена афіцыйным Менскам. У супрацьлеглым выпадку кожны дадатковы дзень знаходжаньня расейскіх вайсковых частак і расейскай тэхнікі павінен разглядацца як акупацыя Беларусі.

Рада БНР усьведамляе, што нават пры ўмове выхаду ўсіх расейскіх вайскоўцаў з тэрыторыі Беларусі сам факт сумесных вучэньняў з Расеяй, краінай-агрэсарам, наносіць вялікую палітычную шкоду Беларусі, а таксама шкоду яе рэпутацыі перад міжнароднай супольнасьцю.

Рада БНР заяўляе, што беларускі народ ня мае дачыненьня да сумнеўнага вайсковага альянсу паміж аўтарытарнымі рэжымамі Беларусі і Расеі. У Беларусі ніколі не было дэмакратычнага рэфэрэндуму, пад час якога б народ выказаўся за вайсковы саюз з Расеяй. Само далучэньне Беларусі да сыстэмы Дамовы аб калектыўцай бясьпецы СНД (ДКБ), якая кантралюецца маскоўскім Генштабам, адбылося ў 1993 годзе пад ціскам пракамуністычнай прарасейскай большасьці ў Вярхоўным Савеце Рэспублікі Беларусь і насуперак Дэклярацыі аб дзяржаўным сувэрэнітэце Беларусі, якая абвяшчала курс на будаўніцтва нэўтральнай дзяржавы. Прынятая ў 1994 годзе Канстытуцыя Рэспублікі Беларусь таксама замацоўвала курс на вайсковы нэўтралітэт Беларусі. Такім чынам, фактычнае далучэньне Беларусі да вайсковага блёку з Расеяй было і застаецца парушэньнем нават дзеючай Канстытуцыі Рэспублікі Беларусь.

Рада БНР, як і дэмакратычная супольнасьць Беларусі, неаднаразова зьвяртала ўвагу на небясьпечныя крокі Крамля ў дачыненьні да Беларусі, на спробы разьмяшчэньня дадатковых вайковых базаў, на ўсё больш шчыльнае ўцягваньне Беларусі ў арбіту расейскіх вайсковых інтарэсаў. Цяперашнія манэўры яшчэ больш абвастрылі гэтую праблему.

Рада БНР папярэджвае, што з улікам поўнай залежнасьці Лукашэнкі ад Масквы, адсутнасьці ў Беларусі ужо больш як два дзесяцігодзьдзя дэмакратычных  выбараў, легітымнага парлямэнту, свабоды сродкаў масавай інфармацыі; а таксама ва ўмовах татальнага панаваньня расейскай прапаганды ў інфармацыйнай прасторы Беларусі, усялякія агрэсіўныя дзеяньні Крамля да Беларусі могуць мець самыя непажаданыя наступствы для беларускай Незалежнасьці.

Рада БНР заклікае ЗША, Вялікабрытанію і Францыю, у выпадку неабходнасьці, выканаць свае абавязкі ў справе гарантыі беларускага сувэрэнітэту, дадзеныя ў адпаведнасьці з Будапэшцкім мэмарандумам узамен на вывад ядзернай зброі з тэрыторыі Беларусі.

Рада БНР заклікае беларускае грамадзтва і беларускіх патрыётаў у шэрагах збройных сілаў Рэспублікі Беларусь быць гатовымі да абароны незалежнасьці Беларусі ад любой вонкавай пагрозы.

Аб уцягваньні Беларусі ў зону вайсковых інтарэсаў Расеі

Пачынаючы ад 1993 году, калі праімпэрская большасьць Вярхоўнага Савету прагаласавала за далучэньне Беларусі да Дамовы аб калектыўнай бясьпецы СНД, краіна пасьлядоўна ўцягваецца ў зону вайсковых інтарэсаў Расеі.

У выніку дамоўленасьцяў, падпісаных Лукашэнкам з Крамлём, Беларусь пераўтварылася ў заходні фарпост Масквы. У такой сытуацыі вялікія сумневы выклікае здольнасьць Узброеных сілаў Беларусі абараніць краіну ў выпадку агрэсіі з боку Масквы, якая патэнцыйна можа ажыцьцявіць яе з мэтай гібрыднай акупацыі па мадэлі Данбасу, з мэтай анэксіі часткі тэрыторыі, як было зроблена ў Крыме, альбо з мэтай поўнай ліквідацыі незалежнасьці Беларусі.

Кіраўніцтва міністэрства абароны Рэспублікі Беларусь, генэралітэт, камандаваньне вайсковых злучэньняў скончылі расейскія вайсковыя акадэміі. У войску, якое афіцыйна лічыцца беларускім, насаджаюцца і пануюць прарасейскія настроі, скажаецца і ганьбіцца сапраўдная славутая гісторыя беларускай нацыі, практычна не ўжываецца і часта варожа ўспрымаецца беларуская мова. Шматлікія вышэйшыя афіцэры публічна падтрымліваюць расейскую агрэсію ва Ўкраіне і анэксію Крыму.

Адначасна, у шмат якіх рэгіёнах краіны пад патранажам асобных сьвятароў РПЦ Маскоўскага патрыярхату, з дазволу мясцовых уладаў, утвараюцца моладзевыя вайсковыя фармаваньні з выразнай арыентацыяй на “рускі мір”, і, фактычна, на ліквідацыю незалежнасьці беларускай дзяржавы. Іх нават гасьцінна прымаюць, ладзяць ім экскурсіі ў некаторых вайсковых частках.

На тэрыторыі Беларусі ўжо знаходзяцца расейскія вайсковыя аб’екты (каля Вілейкі і Ганцавічаў). У апрошні час Масква актыўна дамагаецца стварэньня авіяцыйнай базы. Гэта асабліва небясьпечна з улікам узмацненьня агрэсіўных намаганьняў Крамля і стварэньня Масквой зонаў напружанасьці ў розных рэгіёнах эўразійскага кантынэнту.

Беларусь у такой сытуацыі апынаеца разьменнай манэтай у гульні іншых дзяржаваў, а яе народ – ахвярай, як ужо неаднойчы здаралася ў нашай гісторыі.

Рада Беларускай Народнай Рэспублікі выступае супраць уцягваньня Беларусі ў ваенныя авантуры Расеі і патрабуе як хутчэйшага вываду расейскіх ваенных аб’ектаў з тэрыторыі краіны і непапушчэньня разьмяшчэньня новых ваенных базаў. Войска Беларусі павінна быць не прыдаткам расейскай ваеннай машыны, а абаронцам незалежнасьці краіны.

У выніку агрэсіі асноўны цяжар абароны Айчыны кладзецца на здольнасьць да супраціву самога беларускага народа, які гістарычна даказаў сваю сілу і сваю нязломнасьць.

19 сакавіка 2016 г.

Заява ў фармаце PDF

Рада Беларускае Народнае Рэспублікі,

– Зважаючы на рашэньне расейскіх уладаў аб стварэньні авіяцыйнай базы на тэрыторыі Беларусі,

– Спасылаючыся на Выніковы мэмарандум нарады старшыняў і кіраўнікоў беларускіх палітычных і грамадзкіх арганізацыяў са Старшынёй Рады БНР “Аб захадах дзеля забесьпячэньня незалежнасьці Беларусі” ад 3 лістапада 2012 г. (“Віленскі мэмарандум”),

заяўляе, што дазваляючы стварэньне гэткае базы ў цяперашні час, афіцыйныя ўлады Рэспублікі Беларусь спрыяюць падвышэньню наступальнага патэнцыялу пуцінскай Расеi, супрацьпастауляючы Беларусь іншым краінам нашага рэгіёну і эўра-атлянтычнай супольнасьцi ў цэлым. Рада БНР падкрэсьлівае, што зьяўленьне расейскай вайсковай базы будзе перашкодай для пераадоленьня міжнароднай ізаляцыі Беларусі.

Рада БНР адзначае, што абставіны незаконнай расейскай анэксіі ўкраінскага Крыму дэманструюць гатовасьць Крамля выкарыстоўваць свае замежныя вайсковыя базы супраць краiнаў, якiя дапусьцiлi зьяўленьне гэткіх базаў на сваёй тэрыторыi. У сувязі з гэтым Рада БНР канстатуе, што стварэньне расейскае вайсковае базы істотна падвысіла бы пагрозу для незалежнасьці Беларусі і дало бы пуцінскаму рэжыму важны рычаг узьдзеяньня на Беларусь.

У дадатак да вышэй сказанага, Рада БНР падкрэсьлівае, што, ня будучы легітымным прэзыдэнтам Рэспублікі Беларусь ад 1996 году, Аляксандар Лукашэнка ня мае юрыдычнага права прымаць рашэньні ад iмя Рэспублікі Беларусi, як ня мае гэтага права і сфармаваны насуперак закону і дэмакратычным нормам так званы “Нацыянальны Сход Рэспублікі Беларусь”.

Рада БНР зьвяртае ўвагу на тое, што стварэньне замежнай вайсковай базы на тэрыторыі Беларусі наўпрост супярэчыць Канстытуцыі Рэспублікі Беларусь, у якой замацаванае імкненьне да нэўтральнага статусу нашае краіны.

Рада БНР канстатуе, што міжнародная палітыка цяперашніх афіцыйных уладаў Рэспублікі Беларусь, якая працягвае грунтавацца на таргоўлі беларускім сувэрэнітэтам узамен на эканамічнае і палітычнае спонсарства з боку Крамля, у чарговы раз дэманструе сваю непасярэднюю небясьпеку для беларускай дзяржаўнасьці і прамую супярэчнасьць інтарэсам беларускага народу, а таксама інтарэсам міжнароднай бясьпекі.

Рада БНР зьвяртаецца да падпісантаў Віленскага мэмарандуму, а таксама да іншых беларускіх палітычных дзеячоў, якія стаяць на пазыцыях дэмакратыі і незалежнасьці Беларусі, з заклікам усімі сіламі процістаяць стварэньню замежнай вайсковай базы на тэрыторыі Беларусі.

Рада БНР заклікае ўрады ўсіх сяброўскіх да Беларусі краінаў аказаць дыпляматычны ціск на цяперашнія афіцыйныя ўлады Рэспублікі Беларусь з мэтаю перадухіліць стварэньне базы вайскова-паветраных сілаў пуцінскай Расеі на тэрыторыі Беларусі, якое ставіла б пад дадатковую пагрозу мір і бясьпеку у Эўропе.

Заява ў PDF

Як вы ўжо, магчыма, заўважылі, зьвяртаюся да вас з адкрытымі лістамі рэдка, і толькі калі ўважаю, што жыцьцё вашае і беларуская дзяржава ў вялікай небясьпецы, Сёньня пішу вам ў сувязі з падзеямі ў Грузіі і праектам А.Лукашэнкі падпісаць новыя вайсковыя дамовы з Масквой.

У час, калі ўвесь дэмакратычны сьвет асудзіў маскоўскую агрэсію супраць Грузіі Лукашэнка паехаў сустракацца з пуцінскім паплечнікам не дзеля таго, каб выступіць у абарону пакрыўджанай сувэрэннай дзяржавы, а наадварот – каб павіншаваць злачынныя ўлады суседняй імпэрыі зь іх “прыгожай” агрэсіяй”. Дарагія суродзічы, з жалем гляджу, як некаторыя з вас, замест каб абурацца гэтай ацэнкай падзеяў у Грузіі ад вашага імя, вераць вераць крамлёўскай прапагандзе і ўважаюць яе слушнай і прымальнай.

Ды каб гэта было ўсё!

Ад вашага імя, ад імя зьнямелага беларускага народу, якому не дазволена выказваць сваіх здаровых меркаваньняў ні на гэтую, ні на ніякую іншую тэму, цесна зьвязаную зь ягонай будучыняй, кіраўнік беларускай дзяржавы абяцае маскоўскім сатрапам уваходзіць зь імі ў новыя “абаронныя” дамовы, якія ізноў уцягнуць наш народ у чужыя войны і зробяць яго першай ахвярай любога канфлікту Расеі з рэштай сьвету.

Дарагія суродзічы, не дазвольце, каб такое пагадненьне зьдзейсьнілася. Не дазвольце, каб варожыя вам людзі гандлявалі вашай радзімай і вашым жыцьцём! Вайсковае пагадненьне з Масквой – гэта новы захоп вашага найдаражэйшага скарбу, зямлі вашых продкаў, вашых дзетак, вашых унукаў.

Абавязкам кожнага з нас ёсьць бараніць гэты Богам дадзены нам край. Прашу Усемагутнага, каб данёс да вас мой голас. Каб вы пачулі і зразумелі, да якой ступені сёньняшнія падзеі пагражаюць вашай будучыні. У дачыненьні да Грузіі, Расея паказала свой сапраўдны твар. Паказала яшчэ раз, што паняцьці маральнасьці і людзкой годнасьці для яе ёсьць паняцьцямі чужымі, незразумелымі. Гэтак, як яна напала на маленькую Грузію, гэтак яна скарыстае першую нагоду – альбо прыдумае яе – каб прыслаць свае танкі ў Беларусь. Тады будзе запозна, дарагія суродзічы, бараніцца. Бараніцца трэба цяпер.

Але перад гэтым пратэстуйце ўсімі сіламі супраць заключэньня псэўда-абароннай дамовы з Расеяй, бо станецца ён нашай агульнай магілай.

Жыве Беларусь!

21 жніўня 2008 г.

Івонка Сурвілла,
старшыня Рады Беларускай Народнай Рэспублікі