Спаўняецца 40 гадоў аварыі на Чарнобыльскай атамнай электрастанцыі, больш як 70% радыеактыўных рэчываў зь якой пакрылі тэрыторыю Беларусі. Катастрофа аштавала беларусам тысяч і тысяч жыцьцяў і будзе адчувацца ў стагодзьдзях.

Паводзіны камуністычнага кіраўніцтва тагачаснай БССР пасьля аварыі, імкненьне схаваць праўду пра небясьпеку і ігнараваньне парадаў сумленных навукоўцаў, iх бязьдзейнасьць выявілі злачынную сутнасьць камуністычнага ладу для пакаленьняў, якія нарадзіліся пасьля Курапатаў. Адначасна, пазыцыя кіраўніцтва, у значнай ступені, была вынікам поўнай залежнасьці ад Масквы, якая стагодзьдзямі ставілася да Беларусі як да калёніі.

Дзякуючы высілкам Беларускага Народнага Фронта, беларускае грамадзтва і міжнародная супольнасьць даведаліся праўду пра Чарнобыль. Былі адселеныя тысячы людзей з тэрыторыяў, якія загадалі лічыць «чыстымі», спыненыя сельгаспрацы на забруджаных тэрыторыях і разбаўленьнне прадуктаў радыеактыўнымі, нарэшце, уведзеная сыстэма ільготаў для пацярпелых ад катастрофы. Беларуская дыяспара арганізавала аздараўленьне чарнобыльскіх дзяцей, у шпіталі былі перададзеныя патрэбныя лекі і мэдычнае абсталяваньне.

Аднак усё гэта пачало зварочвацца, а затым і спынілася пасьля прыходу да ўлады стаўленіка Масквы Лукашэнкі. Былі рэпрэсаваныя альбо вымушаныя пакінуць краіну тыя, хто выступаў супраць зварочваньня чарнобыльскіх праграмаў і новага засакрэчваньня інфармацыі.

Сёньня Беларусь, як і ў 1986-м, засталася фактычна сам на сам з чарнобыльскай бядой. І ізноў, як і тады — зь ядзернай зброяй на яе тэрыторыі, якая цалкам кантралюецца Масквой.

У гэтыя дні, калі мы ізноў прыгадваем трагедыю, Рада БНР выказвае словы ўдзячнасьці ўсім, хто дапамагаў і дапамагае беларусам адолець яе наступствы. Зьвесьці іх да мінімуму можна толькі пры спрыяньні і дапамозе ўсяго сьвету. Але беларусы разумеюць і тое, што магчыма гэта толькі тады, калі беларусы ўсталююць дэмакратыю і прававую дзяржаву,
а Беларусь верне сапраўдную Незалежнасьць.

Чарнобыль застанецца зь беларусамі на тысячагодзьдзі, але нялюдзкі прамаскоўскі рэжым Лукашэнкі мусіць быць зьнішчаны як мага раней.

Перад усім хочу прывітаць усіх Вас з нашым вялікім нацыянальным Сьвятам – 25-м Сакавіком.

25-га Сакавіка 1918-га году, наш народ, пасьля амаль паўтара стагодздзя няволі, абвясьціў сьвету, што ён “ськідае з роднага краю апошняе ярмо дзяржаўнай залежнасьці, якую гвалтам накінулі расейскія цары на наш вольны і незалежны край”.
Хочу прыпомніць тут што наш нацыянальны герой Кастусь Каліноўскі ўжо паўстагодзьдзя раней папярэджваў наш народ, што зажыве ён свабодна толькі калі маскаля над ім ня будзе. Гэтыя словы нашая гісторыя пацьвярджае. Менавіта бальшавіцкая Расея патапіла ў крыві незалежнасьць Беларускай Народнай Рэспублікі. Менавіта з Масквы ішлі загады на зьнішчэньне ў Курапатах нацыянальнай творчай і навуковай эліты, на ліквідацыю працавітага сялянства. Памкненьні беларусаў да свабоды і незалежнасьці свайго краю нязьменна душыліся. Нам даводзілася цярпець і фізычны, і духоўны Чарнобыль. А нядоўгі час нацыянальнага Адраджэньня быў спынены стаўленікам Масквы Лукашэнкам.

Нажаль, пасьля ледзь не стагодзьдзя акупацыі і хітрай прапаганды з боку тае самае Масквы, сьвет забыўся пра беларусаў пакуль наш народ ня прыпомніў яму у 2020-м годзе пра нашае існаваньне! Толькі дзякуючы Вашаму гераізму і адвазе сотняў тысяч Беларусаў, якія выйшлі пад бел-чырвона-белымі сьцягамі на вуліцы Беларусі, мы аджылі! Калі-б зноў ня ўмяшалася Масква, магчыма мы ўжо жылі-б у нашым вольным краю. І не змагаліся б сёньня за вызваленьне тысячаў палітычных вязьняў, якія яшчэ ўсё сядзяць за кратамі ў Беларусі.

Дарагія мае суродзічы Беларусы, не дазвольце нашым адвечным ворагам зьдзекавацца над Вамі толькі таму што гэта выгадна аднаму чалавеку! Не давайце нікому называць Вас агрэсарамі суседняй краіны. Мы стары Эўрапейскі народ – нашае месца ў дэмакратычнай Эўропе -і толькі тады, калі мы станемся незалежнымі ад так званага “старэйшага брата” – толькі тады мы зоймем тое пачеснае месца між цывілізаванымі народамі сьвету, на якое мы маем поўнае права!

Хочацца верыць што тады ні Масква ні тэрор ня згасяць тае паходні, якую мы будзем несьці шчыльнымі радамі наперад.

Дарагія мае Сябры, прашу тых з Вас, хто яшчэ не далучыўся да змаганьня за волю і незалежнасьць Бацькаўшчыны, каб памяталі што будучыня наша залежыць ад кожнага і кожнае з нас! Так як нашыя продкі ў 1918-м годзе, разам мы вызвалім наш мілы і чароўны край!

Дык памажы нам Божа!!
Жыве Беларусь!

Івонка Сурвілла,
Старшыня Рады Беларускай Народнай Рэспублікі

25-га САКАВІКА 2026 г.

Дачакаліся мы зноў нашых цудоўных Калядных і навагодніх Сьвятаў, сьвятаў надзеі, калі мы жадаем адны другім, каб сьвет неяк у хуткім часе зьмяніўся на лепшае.

Нажаль, у гэтым годзе гэтая надзея ня споўнілася дзеля злыдняў, якія або нас нішчаць або трымаюць у няволі. Нашая зямля па крысе зноў пераходзіць у рукі захопнікаў, у якіх адна мэта — сьцерці нас з паверхні Зямлі!

Дарагія мае Суродзічы, таму што нам прышлося шмат перажыць за апошняе стагодзьдзе, многія з нас адзінае што жадаюць гэта выжыць неяк да лепшых часоў.

Але ня веру, што наш народ пойдзе ў няволю, каб выжыць! Мы за моцна любім нашую зямлю, за моцна цэнім нашыя людзкія правы каб задаволіцца чужым кавалкам хлеба!

Моцна спадзяюся на нашае пачуцьцё годнасьці і нашыя Эўрапейскія карані, мае дарагія Сябры! Кожны з нас здольны прыдумаць як можна даваць сабе рады і адначасна працаваць на карысьць свайго народу. Трэба толькі выбраць свой шлях. Адзінае на што мы ня можам сабе дазволіць, гэта быць абыякавымі!

Днямі я мела радасьць пагутарыць зь некаторымі нашымі змагарамі за вольную і незалежную Беларусь, якіх Лукашэнка трымаў за кратамі — з Алесем Бяляцкім і Паўлам Севярынцам. Яны ёсьць прыкладамі нязломнасьці і адданасьці Бацькаўшчыне. Асабліва кранула мяне гутарка са Зьмітром Дашкевічам і ягонай жонкай Настай, якія разам з чатырма дзеткамі, нарэшце ўзьядналасіся. Нажаль, адбылося гэта не на беларускай зямлі. І сёньня тысячы беларускіх сем’яў разьяднаныя ці турэмнымі кратамі, ці дзяржаўнымі межамі.

Будзем верыць у тое, што ў бліжэйшым часе ўсе беларусы змогуць быць разам на сваёй вольнай радзіме.

Дык жадаю маім дарагім неабыякавым Суродзічам утульна правесьці гэтыя Сьвяты, а перад усім набрацца сілаў, каб магчы неадкладна брацца за так патрэбную працу на карысьць нашай Бацькаўшчыны.

Дык жадаю Вам посьпеху, дарагія мае Сябры!

Памажы Вам Божа!!!

Жыве Беларусь!

Івонка Сурвілла

Старшыня Рады БНР

Сьнежань 2025

У кантэксьце цяперашняй падрыхтоўкі міжнароднай дамовы, Рада БНР вітае крокі да ўсталяваньня міру, якія не супярэчаць прынцыпам міжнароднага права і сувэрэнітэту Ўкраіны.

Пры гэтым Рада БНР зьвяртае ўвагу ўдзельнікаў перамоўнага працэсу, што сапраўдны, трывалы мір у рэгіёне немагчымы без гарантыяў незалежнасьці Беларусі, аднаўленьня ў ёй канстытуцыйных нормаў і правядзеньня свабодных выбараў.

Рада Беларускай Народнай Рэспублікі выступае за неадкладны вывад расейскіх войскаў (у тым ліку і ядзернай зброі) з тэрыторыі Беларусі і лічыць неабходным зафіксаваць гэта ў міжнароднай дамове.

Дарагія мае Суродзічы Беларусы,
У гэтыя дні, 105 гадоў таму, дзесяць тысяч Случчакоў вырашылі што не
дапусьцяць новай навалы з Усходу, што будуць бараніць пад бел-чырвона-белым
сьцягам Беларускую Народную Рэспубліку.
Зьвяртаюся да вас сёньня, каб прыпомніць усім нам нашых магчыма найбольшых
герояў. Прыпомніць зь вялізарнай удзячнасьцю і сказаць ім, што яны дасюль
жывуць у сэрцы кожнага Беларуса, і што мы верым, што зь іхняй дапамогай, мы
адродзім нашую Бацькаўшчыну, не дазволім ворагам сьцерці яе з паверхні Зямлі.
Дарагія мае Суродзічы, жадаю Вам з глыбіні сэрца дачакацца таго дня, калі мы
зноў станем грамадзянамі нашай вольнай дзяржавы, якая зойме сваё пачэснае
месца між іншымі дэмакратыямі сьвету!
Але для гэтага трэба каб кожны і кожная з нас усьвядомілі сабе, што лёс нашай
зямлі ў нашых руках. Не выпадкова стагодзьдзямі мы адчуваем прыналежнасьць
да яе. Апошні раз вы паказалі гэта ў жнівені 2020-га году, калі цывілізаваны сьвет
пераканаўся, што нават пад ботам дыктатара, вы ведаеце хто вы і верыце ў
вашую вольную будучыню.
Гэта было вашае найнавейшае дасягненьне ў гэтым стагодзьдзі, вынікі якога мы
бачым да сёньня. Нягледзячы на ўсе намаганьні агрэсіўнага суседа і яго
траянскага каня на нашай зямлі, сьвет памятае 20-ты год і ніколі не забудзе тых
сотняў тысяч бел-чырвона-белых сьцягоў, якія луналі ў жнівені над нашым краем!
Збудавалі вы падмурак які дасюль бароніць у сьвеце нашую нацыянальную ідэю і
наш народ.
Дарагія мае суродзічы, заклікаю ўсіх вас з удзячнасьцю адзначыць Дзень Герояў!
Жыве Беларусь!

Старшыня Рады Беларускае Народнае Рэспублікі
Івонка Сурвілла

Сёньня ў Вільні ў Беларускім Доме намесьнік старшыні Рады БНР Мікалай Пачкаеў уручыў журналісту і былому палітвязьню Алегу Грузьдзіловічу Мэдаль Ордэна Пагоні.

Алег Грузьдзіловіч — адзін з вэтэранаў беларускай незалежнай журналістыкі, вядомы сваімі матэрыяламі на палітычную і праваабарончую тэматыку.

У 1995 годзе Алег Грузьдзіловіч сышоў з рэдакцыі «Народнай газэты» пасьля забароны публікацыі ягонага артыкулу пра зьбіцьцё дэпутатаў Апазыцыі БНФ у залі парлямэнта.

Ужо чацьвёрты дзясятак гадоў ён працуе ў беларускай рэдакцыі радыё «Свабода», і заваяваў аўтарытэт як прафэсіянальны і сумленны журналіст.

Алег Грузьдзіловіч наведаў усе судовыя паседжаньні па гучнай справе аб выбуху ў менскім мэтро 11 красавіка 2011 году. Працаваў ня толькі на судзе, але і з дакумэнтамі і сьведкамі. Па выніках гэтай працы ён напісаў кнігу «Хто ўзарваў менскае мэтро?».

За сваю прафэсійную дзейнасьць неаднаразова затрымліваўся, у сьнежні 2021-га быў арыштаваны і неўзабаве асуджаны на паўтары гады пазбаўленьня волі. Гэта быў цяжкі час для яго і для сям’і, але вынікам стала кніга «Мае турэмныя муры» — праўдзівае сьведчаньне пра тое, што ўчыняе рэжым з тымі, хто выступіў за свабоду свайго народа.

Дэкрэтам старшыні Рады БНР Івонкі Сурвіллы ад 25 сакавіка 2025 году за заслугі на ніве змаганьня за волю і незалежнасьць Беларусі і на ніве грамадзкай дзейнасьці Алег Грузьдзіловіч узнагароджаны Мэдалём Ордэну Пагоні.

Дарагія мае суродзічы беларусы!!

Надыходзяць 34-я ўгодкі таго дня, калі 25-га жніўня 1991-га году беларусы
аднавілі самае дарагое, што ёсьць у кожнага народа – Незалежнасьць.
Аднаўленьне Незалежнасьці адбылося ў выніку намаганьняў палітычнага
авангарду нацыянальнай дэмакратыі – Беларускага Народнага Фронту. Аднак
за 25 жніўня 1991 году былі стагодзьдзі змаганьня нашых продкаў, усіх тых,
хто не зьмірыўся з пакаваньнем спачатку царскай, а потым камуністычнай
імпэрыі.
34 гады – пакаленьне людзкога жыцьця на зямлі. Як шмат мы маглі б
асягнуць за гэты час! Беларусь магла б быць краінай, зь якой лічыліся б і
суседзі, і ўвесь сьвет. Краінай заможнай і шчасьлівай, якая была б нашай
супольнай Бацькаўшчынай. Краінай, пра якую марылі пакаленьні папярэднія,
якія клалі жыцьці сваіх лепшых сыноў і дачок у змаганьні з акупантамі.
На жаль, месца чужых захопнікаў заняў дыктатар, які ня толькі ня любіць
зямлі, якую здабыў хлусьнёй, але якой ён гатовы гандляваць, каб утрымаць
узурпаваную ім уладу.
Здраджаны народ застаецца ў няволі, дыктатар пры падтрымцы Масквы
разгарнуў супраць яго татальны тэрор, і сотні тысячаў беларусаў ня маюць
іншага выйсьця, як шукаць прытулку на чужыне.
Але не запозна, дарагія мае суродзічы, думаць пра нашых продкаў, пра
нашыя карані, і пра будучыню!
Мы – і ў Беларусі, і ў дыяспары – мусім берагчы нашую культуру, шанаваць
нашую спадчыну, ня страчваць нашага пачуцьця прыналежнасьці да зямлі, на
якой наш народ пражыў больш за тысячагодзьдзе. Можам і павінны, як казаў
наш вялікі паэта – каб не ўмерці – захоўваць нашу мову
Раскіданыя па ўсім сьвеце, мы маем доступ да іншых народаў. Кожны
чужынец кругом нас мусіць ведаць, што мы – беларусы, чаму мы пакінулі
свой край, як моцна мы яго любім і як шчыра жадаем, каб ён пазбыўся
дыктатуры.
У 2020-м годзе вы паказалі сьвету, што вы жывы народ, што жадаеце самі
вырашаць свой лёс! Вы зрабілі вялізарную справу – але праца гэтая ня
скончаная!
Нягледзячы на вымушаную эміграцыю сотняў тысяч беларусаў, мы застаемся
адзіным народам – тыя, хто на Бацькаўшчыне і тыя, хто на чужыне. Дарагія
беларусы замежжа, давайце навязваць сувязі з суродзічамі, якія нешта
робяць, а такіх між намі шмат! Далучайцеся да міжэтнічных арганізацыяў у
краінах дзе пражываеце! Бярыце ўдзел у іхнім жыцьці, каб яны ведалі, што
ёсьць на сьвеце цудоўныя людзі – беларусы!
Дарагія мае суродзічы! Зь верай і надзеяй у сэрцы, мы дачакаемся ўласнай і
вольнай на векі дзяржавы. Але для гэтага мы мусім адкласьці пакуль што
крытыкі адны другіх. Ня час цяпер беларусам біцца паміж сабой. Бо залёгка
было б двум дыктатарам – Пуціну і Лукашэнку – зьнішчыць нас да апошняга.
Мусім зразумець што мы толькі тады асягнем нашую мэту, калі будзем
зьяднанай нацыяй. Калі нас будзе дзесяць мільёнаў патрыётаў, якія будуць
цаніць волю і людзкую годнасьць!
Ўсе народы ведаюць каштоўнасьць нацыянальнай еднасьці ў часы пагрозы іх
існаваньню. Не давайце расейскім агрэсарам спадзявацца, што ім зноў удасца
захапіць нас, як яны намагаюцца захапіць суседнюю нам дзяржаву.
Нам Бог даў кавалак зямлі, каб мы цанілі і баранілі яго. Не дазвольце
злодзеям зноў адабраць яго ў вас, пакідаючы вас зноў сіротамі ў сябе дома.
Дык памажы нам Божа! Жыве Беларусь!

Івонка Сурвілла,
Старшыня Рады Беларускай Народнай Рэспублікі
Жнівень 2025.

Спаўняецца пяць гадоў ад тых дзён, калі беларусы пад Бел-Чырвона-Белым сьцягам выступілі супраць узурпацыі ўлады стаўленікам Масквы Аляксандрам Лукашэнкам.

Варта нагадаць, што адразу пасьля абвяшчэньня афіцыйнымі ўладамі Беларусі выбараў прэзыдэнта ў сваёй заяве ад 15 траўня 2020 году Рада БНР зьвярнула ўвагу міжнароднай супольнасьці на тое, што ў Беларусі адсутнічаюць умовы для дэмакратычных выбараў, а Лукашэнка, з прычыны нелегітымнасьці т.зв. рэфэрэндуму 2004 году, па выніках якога было скасаванае абмежаваньне колькасьці тэрмінаў на пасадзе прэзыдэнта, ня мае права браць удзел у выбарах.

На незаконнасьць удзелу Лукашэнкі ў выбарах Рада БНР заявіла і пасьля рэгістрацыі кандыдатаў у ліпені 2020-га, адначасна запатрабаваўшы ад афіцыйнага Менску спыніць рэпрэсіі і неадкладна вызваліць усіх затрыманых па палітычных матывах палітыкаў, журналістаў і блогераў. Рада БНР заклікала «правесьці новыя прэзыдэнцкія, парлямэнцкія і мясцовыя выбары ў Беларусі ў прысутнасьці міжнародных назіральнікаў і ў поўнай адпаведнасьці зь міжнароднымі стандартамі і дэмакратычнымі каштоўнасьцямі, якія задэкляраваныя ў Канстытуцыі Рэспублікі Беларусь».

Адразу пасьля галасаваньня 9 жніўня Рада БНР асудзіла фальсыфікацыі і гвалт супраць мірных дэманстрантаў, якія выказалі пратэст супраць парушэньняў выбарчага заканадаўства і ўзурпацыі ўлады.

«Па ўсіх прыкметах, Аляксандар Лукашэнка пацярпеў паразу на выбарах і ня можа лічыцца легітымным прэзыдэнтам Рэспублікі Беларусь» — заявіла Рада БНР і заклікала да «неадкладнага вызваленьня ўсіх палітычных зьняволеных і да правядзеньня новых сумленных прэзыдэнцкіх выбараў па агульнапрынятых дэмакратычных стандартах і без удзелу Аляксандра Лукашэнкі».

Таксама, Рада заклікала беларусаў замежжа да актыўнага пратэсту з мэтаю данясеньня інфармацыі пра сытуацыю ў Беларусі да ўрадаў замежных краінаў.

«Рада БНР заклікае міжнародную супольнасьць аказаць максымальны ціск на рэжым Лукашэнкі з мэтаю спыненьня тэрору супраць беларусаў і правядзеньня новых, свабодных, выбараў» — гаварылася ў заяве.

У наступныя месяцы Рада БНР неаднаразова пацьвярджала падтрымку пратэстоўцам, патрабавала вызваленьня палітвязьняў, заклікала прэзыдэнтаў, парлямэнты і ўрады сьвету, міжнародныя арганізацыі да актыўных дзеяньняў у справе падтрымкі беларускага народа, які выступіў у абарону сваіх палітычных і грамадзянскіх правоў.

У часе масавых выступаў супраць узурпатара беларусы выявілі сапраўдную мужнасьць перад абліччам брутальнага гвалту, прадэманстравалі самаарганізацыю і салідарнасьць, цалкам пацьвердзілі сваё права «людзьмі звацца» зь вялікай годнасьцю.

Тое, што масавыя выступы адбываліся пад Бел-Чырвона-Белым сьцягам, засьведчыла адданасьць беларусаў нацыянальным каштоўнасьцям, нягледзячы на шматгадовае навязваньне ўладай штучных сымбаляў.

Не выклікае сумневу, што толькі тэрорам супраць народа і падтрымкай Масквы, якая 27 жніўня 2020 абвясьціла аб разгортваньні сілаў каб здушыць магчымую перамогу народа ў Беларусі, тлумачыцца ўтрыманьне Лукашэнкі ва ўладзе.

Расплаціўся Лукашэнка з Крамлём —лёсам народа і міжнародным аўтарытэтам дзяржавы. Злачынная змова з Пуціным сталася пралёгам для палітычнай зачысткі краіны перад выкарыстаньнем тэрыторыі Беларусі для агрэсіі РФ супраць Украіны.

5-я гадавіна падзеяў жніўня 2020-га прыпадае на час, калі тысячы адданых Беларусі сыноў і дачок знаходзяцца ў вязьніцах, а сотні тысяч былі вымушаныя пакінуць Бацькаўшчыну, калі Лукашэнка, выконваючы жаданьне Масквы, зьнішчае нацыянальную ідэнтычнасьць беларусаў і фактычна праводзіць палітыку этнацыду.

Ніколі яшчэ Беларусь не перажывала ў сваёй найноўшай гісторыі нагэтулькі цяжкія часы, як цяпер. І тым большую павагу выклікаюць беларусы на Бацькаўшчыне, якія засталіся верныя нацыянальнаму Адраджэньню, ідэалам свабоды і дэмакратыі — і беларусы замежжа, якія не спыняюць дапамогу палітычным вязьням і іх сем’ям, ствараюць беларускія адукацыйныя і культурніцкія асяродкі, грукаюцца ў дзьверы замежных палітыкаў з мэтай не забывацца пра Беларусь.

Вінаватыя ў тэроры і іншых злачынствах супраць беларускага народу і супраць чалавечнасьці маюць быць прыцягнуты да адказнасьці будучай дэмакратычнай уладай у Беларусі.

Рада БНР заяўляе, што аднаўленьне дэмакратыі ў Беларусі, правядзеньне сумленных выбараў усіх узроўняў па агульнапрынятых дэмакратычных стандартах у цалкам незалежнай беларускай нацыянальнай дзяржаве, мае заставацца галоўнай беларускай палітычнай мэтаю на гэтым гістарычным этапе

Рада БНР выказвае падтрымку і салідарнасьць усім, хто набліжае сьветлую будучыню вольнай і дэмакратычнай Бацькаўшчыны.

Жыве Беларусь!

Жнівень 2025.

Сымбалічна, што фэстываль праводзіцца ў месцах цяпер ужо легендарнага «Басовішча», якое дзесяцігодзьдзямі зьбірала ня толькі моладзь Падляшша, але і выканаўцаў ды гледачоў зь Беларусі.

Сёньня прарасейскі рэжым Лукашэнкі пасьлядоўна нішчыць беларускія нацыянальныя каштоўнасьці, падаўляе ўсялякую культурніцкую ініцыятыву, якая не адпявядае сумнеўным ідэалягічным догмам. Беларуская культура на тэрыторыі Беларусі фактычна існуе ў падпольлі.

І таму асабліва важны і каштоўны Фэстываль абуджаных TUTAKA, які дае цудоўную магчымасьць беларускім творцам выявіць свае таленты ў вольных умовах.

Дык жадаю вам, дарагія суродзічы, запамінальных імпрэзаў, цікавых сустрэчаў і карыснага адпачынку!

Жыве Беларусь!

Івонка Сурвілла,

Старшыня Рады Беларускай Народнай Рэспублікі

Ліпень 2025

Атава.

Чвэрць стагодзьдзя — тэрмін, які дазваляе падсумаваць вынікі. Сёньня відавочна, што значнасьць установы Kamunikat.org, офіс якой месьціцца ў Беластоку, даўно перайшла межы Падляшша і Польшчы.

Беларуская нацыя перажывае сёньня бадай што самыя цяжкія часы за апошнія дзесяцігодзьдзі, а маштаб і інтэнсіўнасьць разбурэньня культуры, зьнішчэньня нацыянальных каштоўнасьцяў увогуле ні з чым не параўнальны на памяці цяпер жывучых пакаленьняў.

Ва ўмовах, калі прамаскоўскі рэжым зьнішчае ўсё беларускае ў Беларусі, вельмі важнымі робіцца ініцыятывы беларусаў у вольным сьвеце. І Інтэрнэт-Бібліятэка Kamunikat.org ёсьць цудоўным прыкладам мэтанакіраванай і пасьлядоўнай працы.

Сёньня гэта ня толькі свабоднае і адкрытае сховішча носьбітаў беларускага слова, выданьняў мастацкай, навуковай і дакумэнтальнай літаратуры, беларускай пэрыёдыкі.

Kamunikat.org — і выдавец, і асьветнік на ніве беларушчыны.

Рада БНР высока цэніць унёсак Інтэрнэт-Бібліятэкі Kamunikat.org у беларускую справу, сьведчаньнем чаго ёсьць узнагароджаньне яе заснававльніка і кіраўніка Яраслава Іванюка Мэдалём Ордэну «Пагоні».

Дык віншую ўсіх вас з выдатным юбілеем і жадаю плёну ў вашай выскароднай справе на карысьць нацыянальнага Адраджэньня!

Жыве Беларусь!

Івонка Сурвілла,

Старшыня Рады Беларускай Народнай Рэспублікі

20 чэрвеня 2025

Атава.